සැකය සහ ආවේගය එක් වූ මොහොතක්, අවසානයේ තරුණ ජීවිතයක් අඳුරු ඉරණමකට ඇද දමා තිබේ. තම සැමියා වෙනත් කාන්තාවක සමඟ අනියම් සම්බන්ධතාවයක් පවත්වන බවට ඇති වූ සැකයක් හේතුවෙන්, ධාවනය වෙමින් තිබූ ත්රිරෝද රථයකින් මහමගට පැනීමෙන් 24 හැවිරිදි තරුණ මවක් ජීවිතක්ෂයට පත්වූ පුවතක් පනාමුර ප්රදේශයෙන් වාර්තා වේ.
පනාමුර පොලිසිය සඳහන් කළේ, මෙලෙස මියගොස් ඇත්තේ බුලුතොට, යක්මඩිත්ත ප්රදේශයේ පදිංචි දිල්හාරා සෙව්වන්දි නැමැති එක්දරු මව බවයි.
පසුගිය 12 වැනිදා ඇය සහ සැමියා පනාමුර ප්රදේශයේ පිහිටි ඇගේ මහගෙදරට ගොස් තිබුණේ දෙමාපියන්ගේ සුවදුක් විමසා බැලීම සඳහාය. එහෙත් ආපසු පැමිණෙමින් සිටියදී, දෙදෙනා අතර බහින්බස් වීමක් හටගෙන තිබේ. සැමියාගේ හැසිරීම සම්බන්ධයෙන් කලක සිට සිත තුළ පැවති සැකය එහිදී උණුසුම් වචන හුවමාරුවක් බවට පත්ව ඇති බව පොලිසිය පවසයි.
ආවේගයට පත් වූ බිරිඳ, තමන් රථයෙන් පනින බවට තර්ජනය කර ඇති අතර, සැමියාට ප්රතිචාර දැක්වීමට අවස්ථාවක් නොතබා ධාවනය වෙමින් තිබූ ත්රිරෝද රථයෙන් මහමගට පැන තිබේ.
බරපතළ තුවාල ලැබූ ඇය වහාම පනාමුර රෝහලට ඇතුළත් කළ අතර, පසුව ගාල්ල කරාපිටිය ශික්ෂණ රෝහල වෙත මාරු කර යවා ඇත. දින කිහිපයක් ජීවිතයත් මරණයත් අතර සටනක නිරත වූ ඇය, අවසානයේ පෙරේදා දිනයේදී මියගොස් තිබේ.
සිද්ධිය සම්බන්ධයෙන් මියගිය කාන්තාවගේ සැමියා පනාමුර පොලිසිය විසින් අත්අඩංගුවට ගෙන ඇත. ඔහු ලබාදුන් ප්රකාශ අනුව, බිරිඳට ඇතිව තිබූ සැකය පදනම් විරහිත එකක් බවත්, අදාළ කාන්තාව සමඟ කිසිදු අනියම් සම්බන්ධතාවයක් නොතිබූ බවත් ඔහු පවසා තිබේ.
කෙසේ වෙතත්, බිරිඳගේ ආවේගශීලී ක්රියාව වැළැක්වීමට හෝ වාහනය නවත්වා ඇගේ ජීවිතය ආරක්ෂා කිරීමට ප්රමාණවත් උත්සාහයක් නොගැනීම සම්බන්ධයෙන් ඔහුට එරෙහිව චෝදනා එල්ල වී ඇත. පශ්චාත් මරණ පරීක්ෂණයෙන් අනතුරුව සිද්ධිය පිළිබඳ වැඩිදුර විමර්ශන සිදු කිරීමට පොලිසිය නියමිතය.
ක්ෂණික කෝපයත් සැකයත් එක්වූ එක් තීරණයක්, අවසානයේ නැවත කිසිදා ආපසු නොලැබෙන තරුණ ජීවිතයක් මහමග අහිමි කර තිබේ.
