මහල් නිවසක ඉහළ මාලයෙන් ඇවිළුණු ගිනිදැල් නිවී ගිය පසු, එහි ඉතිරිව තිබුණේ අළු වී ගිය ජීවිත තුනක දුක්ඛිත කතාවකි. දේපළක් සම්බන්ධයෙන් ඇවිළුණු කෝපය, අහිංසක ජීවිත බිලිගනිමින් නිවසක්ම සුසානයක් බවට පත් කළ අඳුරු අවසානයක් මෙයයි.
මහරගම පමුණුව පාරේ, එක්සත් සුබසාධක මාවතේ පිහිටි දෙමහල් නිවසකට අමානුෂික ලෙස ගිනි තැබීමෙන්, එහි කුලී පදනම මත පදිංචිව සිටි මවක් සහ ඇයගේ 16 හැවිරිදි දියණිය ජීවිතක්ෂයට පත්ව ඇත. මෙම සිද්ධියේ ප්රධාන සැකකරු ලෙස සැලකෙන 76 හැවිරිදි නිවෙස් හිමියාද, ගින්නට ලක්ව බරපතළ පිළිස්සුම් තුවාල ලබා රෝහල්ගත කිරීමෙන් පසු පසුදින අලුයම මියගොස් තිබේ.
පසුගිය 18 වැනිදා රාත්රියේ මෙම අනර්ථය සිදුවන විට, නිවැසියන් නින්දට ගොස් සිටි බව සැලකේ. ගින්නෙන් මියගොස් ඇත්තේ 55 හැවිරිදි එම්. බී. රත්නකාන්ති වික්රමආරච්චි සහ ඇයගේ දියණිය වන 16 හැවිරිදි එස්. වත්සරණි රත්නායක යන දෙදෙනායි. මෙම ගිනි තැබීමෙන් බරපතළ තුවාල ලැබූ දැරියගේ පියා වන 46 හැවිරිදි චමින්ද රත්නායක මේ වන විට කළුබෝවිල ශික්ෂණ රෝහලේ දැඩි සත්කාර ඒකකයේ ප්රතිකාර ලබමින් සිටියි.
ප්රදේශවාසීන් වහා මැදිහත් වී ගින්න පාලනය කර, තුවාල ලැබූ පුද්ගලයන් රෝහල්ගත කළ අතර, පසුව සිදුකළ පරීක්ෂාවකදී මව සහ දියණියගේ දැවී ගිය මළ සිරුරු නිවසේ කාමරයක් තුළින් සොයාගෙන ඇත.
පොලිස් විමර්ශන අනුව, මෙය හදිසි අනතුරක් නොව, පෙර සැලසුම් කළ කෘර අපරාධයක් බවට අනාවරණය වී ඇත. සිද්ධිය වූ ස්ථානයේ තද ලෙස පෙට්රල් ගඳ පැවති අතර, නිවෙස් හිමියා ලෙස හඳුනාගත් ඔලිවර් පැට්රික් විජේසිංහ නමැත්තා පෙට්රල් රැගෙන ඉහළ මාලයට ගොස් ගිනි තැබූ බවට සැක පළ වෙයි. ගින්න පැතිර යාමේදී ඔහුද එයට ගොදුරු වී තිබේ. මෙම සිද්ධියට මුල් වූයේ කුලී මුදල් සම්බන්ධයෙන් පැවති දිගුකාලීන ආරවුලක් බවටද තොරතුරු හෙළි වී ඇත.
නිවසේ පහළ මාලයේ තවත් පවුලක් කුලී පදනම මත පදිංචිව සිට ඇති අතර, මියගිය නිවෙස් හිමියා පහළ මාලයේ කාමරයක වාසය කර ඇත. ඉහළ මාලය පෙර ඔහුගේ පුත්රයාගේ පවුල පදිංචිව සිටියද, පියා සමඟ ඇතිවූ ගැටුමකින් පසු එය කුලියට දී ඇති අතර, කුලී මුදල් සම්බන්ධයෙන් පාර්ශව අතර ගැටුම් වරින්වර ඇතිවී තිබූ බවද විමර්ශනවලදී හෙළි වී ඇත.
මෙම සිද්ධිය සම්බන්ධයෙන් නුගේගොඩ මහේස්ත්රාත්වරයා විසින් පරීක්ෂණ පවත්වා ඇති අතර, මහරගම පොලිසියේ අපරාධ විමර්ශන අංශය වැඩිදුර පරීක්ෂණ සිදුකරයි.
අවසානයේදී, දේපළ හා මුදල් පිළිබඳ ඇතිවූ අතිශය කෝපයක් ජීවිත කිහිපයක් අහිමි කරමින්, නිවසක්ම අළු බවට පත් කළ මෙම ඛේදවාචකය, ඉතිරි කර ඇත්තේ පිළිස්සුණු බිත්ති අතර සදාකාලික වේදනාවක් පමණි.
