බ්රසීල කාන්තා ක්රිකට් කණ්ඩායමේ ලෝරා කාර්ඩෝසෝ, විස්සයි විස්ස ජාත්යන්තර ක්රිකට් ඉතිහාසයේ නව ලෝක වාර්තාවක් පිහිටුවමින් එක් ඉනිමකදී කඩුලු නවයක් දවාගත් ලොව පළමු ක්රීඩිකාව බවට පත්ව තිබේ. ලෙසෝතෝ කණ්ඩායමට එරෙහි තරගයකදී පන්දුවාර තුනක් පමණක් යවා ලකුණු 4කට කඩුලු 9ක් දවාගත් ඇය, අතිවිශිෂ්ට පන්දු යැවීමකින් මෙම සුවිශේෂී ජයග්රහණය ලබා ගත්තාය.
ලකුණු 203ක දැවැන්ත ඉලක්කයක් හඹා ගිය ලෙසෝතෝ කණ්ඩායම පන්දුවාර 6.2ක් තුළ ලකුණු 13කට සීමා වීමට කාර්ඩෝසෝගේ පන්දු යැවීම ප්රධාන හේතුවක් විය. මෙම වාර්තාවත් සමඟින්, 2025දී භූතානයේ සෝනම් යෙෂේ විසින් ලබාගත් 8/7 වාර්තාවද, 2024දී ඉන්දුනීසියාවේ රොහ්මාලියා රොහ්මාලියා විසින් තැබූ 7/0 කාන්තා වාර්තාවද බිඳ වැටුණි.
21 හැවිරිදි කාර්ඩෝසෝ සිය විශිෂ්ට දස්කම ආරම්භ කළේ පිට පිට පන්දු පහකදී කඩුලු පහක් දවා ගනිමිනි. දෙවන පන්දුවාරයේ අවසන් පන්දු තුනට සහ ඊළඟ පන්දුවාරයේ මුල් පන්දු දෙකට කඩුලු පහක් ලබාගත් ඇය, පසුව තවත් කඩුලු හතරක්ද එකතු කරමින් ලෙසෝතෝ ඉනිම සම්පූර්ණයෙන්ම කඩා දමන්නට සමත් වූවාය.
කෙසේ වෙතත්, අවසන් කඩුල්ල ස්ටම්ප් කිරීමකට හසු කරගැනීමට මේරියන් ආටර් සමත් වීමත් සමඟ කාර්ඩෝසෝට එක් ඉනිමකදී කඩුලු 10ම දවාගැනීමේ අවස්ථාව අහිමි විය. එම ඉනිමේ ලින්ඩිවේ පොලාකි ලකුණු ලබාගත් ලෙසෝතෝ පිතිකාරිනියන් අතරින් එක් අයෙකි.
මෙම විශිෂ්ට දස්කම පිළිබඳව අදහස් දක්වමින් බ්රසීල ක්රිකට් ආයතනයේ සභාපතිනී රොබර්ටා මොරෙට්ටි සඳහන් කළේ, කාර්ඩෝසෝ අනාගතයේ ඉහළම මට්ටමේ ජාත්යන්තර ක්රිකට් ක්රීඩා කිරීමට හැකියාව ඇති විශේෂ දක්ෂතාවයකින් යුතු ක්රීඩිකාවක් බවයි. බිම් මට්ටමේ වැඩසටහන් හරහා ඉදිරියට පැමිණි ඇය බ්රසීලයෙන් බිහි වූ විශිෂ්ටතම ක්රීඩිකාවන් අතර එක්වෙන බවද ඇය අවධාරණය කළාය.
බොට්ස්වානාහි ගැබරෝන් නගරයේ පැවැත්වෙන කලහාරි කාන්තා විස්සයි විස්ස තරගාවලිය යටතේ මෙම තරගය පැවැත්වුණු අතර, බ්රසීල කණ්ඩායම මේ දක්වා මුහුණ දුන් තරග පහේම අපරාජිතව ඉදිරියට යමින් සිටී.
