මෙලෙස මියගොස් ඇත්තේ අන්ධේරි ප්රදේශයේ ජංගම දුරකථන උපාංග අලෙවිසැලක් පවත්වාගෙන ගිය 40 හැවිරිදි අබ්දුල්ලා දොකාඩියා, ඔහුගේ 35 හැවිරිදි බිරිඳ නස්රීන් සහ ඔවුන්ගේ දියණියන් වූ 16 හැවිරිදි අයේෂා හා 13 හැවිරිදි සයිනබ් යන සිව්දෙනාය. පයිදෝනි හි ජේ.ජේ. මාර්ගයේ පිහිටි ‘මුගල්’ ගොඩනැගිල්ලේ දෙවන මහලේ පිහිටි ඔවුන්ගේ නිවස අද වන විට නිහඬව පවතින අතර, අසල්වැසියන්ට එය දැඩි වේදනාවක් වී ඇත.
පසුගිය අප්රේල් 25 වැනිදා රාත්රියේ අබ්දුල්ලා සිය නිවසේ කුඩා පවුල් සාදයක් සංවිධානය කර තිබූ අතර, එයට සහෝදර සහෝදරියන් ඇතුළු ඥාතීන් කිහිප දෙනෙකු ද එක්ව සිටියහ. එහිදී බුරියානි සහ චිකන් පිලාෆ් ආහාරයට ගෙන තිබූ අතර, ආරම්භයේ කිසිදු ගැටලුවක් මතු වී නොතිබුණි.
කෙසේ වෙතත්, රාත්රී අලුයම 1ට පමණ පවුලේ සිව්දෙනාම අතුරුපසක් ලෙස පැණි කොමඩු ආහාරයට ගෙන තිබූ බව හෙළි වී තිබේ. එමෙන් පසු අලුයම 5ට පමණ ඔවුන්ට දැඩි වමනය, පාචනය සහ කරකැවිල්ල වැනි රෝග ලක්ෂණ මතුව තිබූ අතර, වහාම එම ගොඩනැගිල්ලේම පදිංචි වෛද්යවරයෙකුගේ උපදෙස් මත රෝහල්ගත කර ඇත.
පළමුව සබූ සිද්දික් රෝහලටත්, අනතුරුව වැඩිදුර ප්රතිකාර සඳහා ශ්රීමත් ජේ.ජේ. රෝහලටත් ඇතුළත් කළද, වෛද්යවරුන්ගේ සියලු උත්සාහයන් ව්යර්ථ විය. ඉරිදා උදෑසන කුඩා සයිනබ් ජීවිතක්ෂයට පත්වූ අතර, ඉන් අනතුරුව මව සහ වැඩිමහල් දියණිය ද මියගොස් ඇත. සිය පවුලම තමන් ඉදිරිපිට අහිමිවූ වේදනාව දරාගත නොහැකි වූ අබ්දුල්ලා ද එදිනම රාත්රියේ ජීවිතයෙන් සමුගෙන තිබේ.
මෙම මරණවලට නිශ්චිත හේතුව මෙතෙක් අනාවරණය වී නොමැති අතර, පොලිසිය එය හදිසි මරණ ලෙස සටහන් කර පරීක්ෂණ ආරම්භ කර තිබේ. ඉතිරි වූ ආහාර හා අඩක් ආහාරයට ගත් පැණි කොමඩු කොටස් රසායනාගාර පරීක්ෂණ සඳහා යොමුකර ඇති බව වාර්තා වේ.
වෛද්යවරුන්ගේ මූලික සැකය වී ඇත්තේ සාමාන්ය ආහාර විෂවීමකට වඩා බරපතළ රසායනික ද්රව්යයක්, කෘමිනාශකයක් හෝ විෂ සහිත ද්රව්යයක් පැණි කොමඩුව තුළ අඩංගු වී තිබිය හැකි බවයි.
අප්රේල් 27 වැනිදා පවුලේ සිව්දෙනාම එකම ස්ථානයක භූමදානය කළ අතර, එම අවස්ථාවට එක්වූ සියල්ලන්ම දැඩි ශෝකයෙන් පසුවිය. මේ සිදුවීම, දිනපතා අපගේ ආහාර මේසයට පැමිණෙන පලතුරු සහ ආහාරවල ආරක්ෂාව පිළිබඳව බරපතළ ප්රශ්නයක් සමාජය හමුවේ නැවතත් මතුකර තිබේ.
