බටහිර ලන්ඩනයේ ළදරු පාසල් දෙකක කුඩා දරුවන් 21 දෙනෙකුට කෲර ලෙස හිංසා කළ බවට වරදකරු වී වසර අටක සිරදඬුවමක් නියම වූ පෝලන්ත ජාතික ළදරු පාසල් සේවිකාවක්, මාස 14ක පමණ කාලයක් සිරගතව සිටීමෙන් අනතුරුව සිය මව් රටට පිටුවහල් කර තිබේ. 23 හැවිරිදි රොක්සානා ලෙකා නමැති මෙම කාන්තාව 2023 සහ 2024 අතර මාස හතක කාලයක් පුරා මෙම අපරාධ සිදුකර ඇති අතර, බ්රිතාන්ය රජයේ “කල්තියා ඉවත් කිරීමේ” වැඩසටහන යටතේ පසුගිය පෙබරවාරි මාසයේදී ඇය පෝලන්තයට යවා ඇත.
ලෙකා සේවය කළ ට්විකන්හැම්හි මේ වනවිට වසා දමා ඇති රිවර්සයිඩ් ළදරු පාසල සහ හවුන්ස්ලෝහි ලිට්ල් මන්ච්කින්ස් ළදරු පාසල තුළදී ඇය කුඩා දරුවන්ට පහරදීම, පයින් ගැසීම සහ කොනිත්තා තුවාල කිරීම ඇතුළු බරපතළ හිංසන සිදුකර තිබූ බව අනාවරණය වී ඇත. ඇය දරුවන් හත් දෙනෙකුට හිංසා කළ බව පිළිගෙන ඇති අතර, තවත් දරුවන් 14 දෙනෙකුට අපයෝජනය කිරීම සම්බන්ධයෙන්ද වරදකාරිය වී තිබේ. නින්ද නොයාම, කංසා සහ වේප් භාවිතයට ඇබ්බැහි වීම හේතුවෙන් මෙම ක්රියා සිදුවූ බව පවසමින් ඇය තම ක්රියා සාධාරණීකරණය කිරීමටද උත්සාහ කර තිබුණි.
මෙම තීරණය සම්බන්ධයෙන් විපතට පත් දරුවන්ගේ දෙමාපියන් දැඩි විරෝධය පළ කර තිබේ. ඔවුන් පවසන්නේ ලෙකා නිදහස් කර පිටුවහල් කරන බව තමන්ට දැනුම් දී ඇත්තේ ඒ සඳහා සතියකටත් අඩු කාලයකට පෙර බවයි. ලෙකාගේ හිංසනයට ලක්වූ දරුවෙකුගේ පියෙකු බීබීසීයට අදහස් දක්වමින් සඳහන් කළේ, රිමාන්ඩ් කාලයද ඇතුළුව මාස 14කට පසු ඇය නිදහස් කර යැවීම කිසිසේත්ම සාධාරණ නොවන බවයි. නඩු විභාගය වෙනුවෙන් තම පවුල වැය කළ කාලය සහ මානසික වේදනාව මෙයින් අවතක්සේරු වී ඇති බවද ඔහු කියා සිටියේය.
ලෙකා පෝලන්තයට පිටුවහල් කළ පසු ඇයට එරටදී කිසිදු නීතිමය ක්රියාමාර්ගයකට මුහුණ දීමට සිදු නොවන බවත්, ඇය නැවත දරුවන් සමඟ වැඩ කරන ක්ෂේත්රයකට පිවිසීමේ අවදානමක් පවතින බවත් වාර්තා වේ. ලෙකාගේ ප්රහාර හේතුවෙන් තම පුතාගේ සිරුරේ දැඩි තැලීම් ඇති වූ බව පැවසූ එක් මවක් සඳහන් කළේ, එම කම්පනය හේතුවෙන් තම දරුවා තවමත් තනිව නිදාගැනීමට බිය වන බවයි. ඇය වැඩිදුරටත් චෝදනා කළේ, මෙවැනි අපරාධකරුවන් කිසිදු පසු විපරමකින් තොරව වෙනත් රටකට මුදාහැරීමෙන් තවත් දරුවන් අනතුරට ලක්විය හැකි බවයි.
මෙම සිදුවීම පිළිබඳව අදහස් දක්වමින් ට්විකන්හැම් ප්රදේශයේ ලිබරල් ප්රජාතන්ත්රවාදී පාර්ලිමේන්තු මන්ත්රී මුනිරා විල්සන් සඳහන් කළේ, විදේශීය අපරාධකරුවන් බ්රිතාන්යයට පැමිණ බරපතළ අපරාධ සිදුකර, වින්දිතයින්ට නිසි යුක්තිය ඉටු වීමට පෙර නිදහස් වී යාමේ භයානක ප්රවණතාවයක් මෙවැනි තීරණ හරහා ඇතිවිය හැකි බවයි. ඇය විශේෂයෙන්ම වින්දිත පාර්ශ්වයන්ට තොරතුරු දැනුම් දීමේදී ඇති වූ සන්නිවේදන දුර්වලතා දැඩි ලෙස විවේචනය කළාය.
මේ අතර, අධිකරණ අමාත්යාංශයේ ප්රකාශකයෙකු ප්රකාශ කළේ ලෙකාට නැවත එක්සත් රාජධානියට ඇතුළුවීම සම්පූර්ණයෙන්ම තහනම් කර ඇති බවයි. විදේශීය අපරාධකරුවන් පිටුවහල් කිරීමේ රජයේ වැඩපිළිවෙළ යටතේ පසුගිය වසරේදී පමණක් අපරාධකරුවන් 5,000කට වැඩි පිරිසක් පිටුවහල් කර ඇති අතර, එය පෙර වසරට සාපේක්ෂව සියයට 14ක වැඩිවීමක් බවද ඔහු සඳහන් කළේය.
