සීදූව පොලිස් බලප්රදේශයට අයත් මූකලන්ගමුව ප්රදේශයේ පිහිටි නිවසකින් අසාමාන්ය දුර්ගන්ධයක් නිකුත් වන බවට ඊයේ (20) සන්ධ්යාවේ සීදූව පොලිසියට ලැබුණු තොරතුරක් මත සිදුකළ පරීක්ෂාවකදී බිහිසුණු මිනීමැරුමක් අනාවරණය වී තිබේ.
අදාළ තොරතුරට අනුව ක්ෂණිකව ක්රියාත්මක වූ පොලිස් කණ්ඩායමක් නිවස පරීක්ෂා කිරීමේදී, එහි නිදන කාමරයක් තුළ තිබූ ගමන් බෑගයක් ඇතුළත ඉතා සූක්ෂ්ම ලෙස සඟවා තිබූ කාන්තා මළ සිරුරක් සොයාගෙන ඇත.
මෙලෙස මියගොස් ඇත්තේ සීදූව මූකලන්ගමුව ප්රදේශයේ පදිංචි 79 හැවිරිදි වයෝවෘද්ධ කාන්තාවක් බව හඳුනාගෙන තිබේ. මූලික විමර්ශනවලදී අනාවරණය වී ඇත්තේ ඇය දිගු කාලයක් තිස්සේ එම නිවසේ තනිව ජීවත්ව සිට ඇති බවයි.
සිද්ධිය සම්බන්ධයෙන් සිදුකළ නිරීක්ෂණවලදී නිවසේ සවිකර තිබූ CCTV ආරක්ෂක කැමරා පද්ධතිය ගලවා ඉවත් කර ඇති අතර, දුරකථන රැහැන් ද කපා දමා තිබූ බව හෙළිවී ඇත. ඒ අනුව මෙම මරණය සංවිධානාත්මක ඝාතනයක් විය හැකි බවට පොලිසිය සැක පළ කරයි.
මෙම සිද්ධියට අදාළ මහේස්ත්රාත් පරීක්ෂණය සහ පශ්චාත් මරණ පරීක්ෂණය අද (21) පැවැත්වීමට නියමිත අතර, අපරාධයට සම්බන්ධ සැකකරුවන් හඳුනාගෙන අත්අඩංගුවට ගැනීම සඳහා සීදූව පොලිසිය විසින් පුළුල් විමර්ශන ආරම්භ කර තිබේ.
