තායිලන්තයේ බැංකොක් නගරයේ මධ්යම ප්රදේශයේ පිහිටි කාර්යබහුල මංසන්ධියකදී භාණ්ඩ ප්රවාහන දුම්රියක් සහ මගී බස් රථයක් එකිනෙක ගැටීමෙන් සිදුවූ දරුණු අනතුරකින් පුද්ගලයන් අට දෙනෙකු ජීවිතක්ෂයට පත්ව තිබේ. මෙම අනතුර 2026 මැයි 16 වන සෙනසුරාදා පස්වරුවේ අසෝක්–ඩින් ඩේන්ග් මාර්ගයේ, මක්කාසන් ගුවන් තොටුපළ දුම්රිය ස්ථානය අසල දුම්රිය හරස් මාර්ගයේදී සිදුව ඇති බව විදෙස් මාධ්ය වාර්තා කරයි.
ගැටීමෙන් අනතුරුව බස් රථය හදිසියේම ගිනිගෙන ඇති අතර, එම ගින්න අසල නවතා තිබූ මෝටර් රථ සහ යතුරුපැදි කිහිපයකටද පැතිර ගොස් තිබේ. ගිනි නිවන භටයින් සහ සහන සේවා කණ්ඩායම් වහාම ක්රියාත්මක වුවද, බස් රථය ඇතුළු වාහන කිහිපයක්ම සම්පූර්ණයෙන් දැවී ගොස් ඇති බව සඳහන් වේ.
අනතුරින් මියගොස් ඇත්තේ බස් රථයේ ගමන් ගත් මගීන් බව බලධාරීන් තහවුරු කර ඇති අතර, තවත් පුද්ගලයන් 25ත් 35ත් අතර පිරිසක් තුවාල ලබා ඇත. ඉන් කිහිප දෙනෙකුගේ තත්ත්වය බරපතළ බවද වාර්තා වේ. තුවාලකරුවන් වහාම අවට රෝහල් වෙත ඇතුළත් කිරීමට පියවර ගෙන තිබේ. එරවන් වෛද්ය මධ්යස්ථානයේ සම්බන්ධීකරණයෙන් ගලවාගැනීමේ මෙහෙයුම් සිදුකර ඇති අතර, පොලිසිය සහ ගිනි නිවන අංශ ඒකාබද්ධව ගින්න පාලනය කිරීමට කටයුතු කර ඇත.
ඇසින් දුටු සාක්ෂිකරුවන් සහ ආරක්ෂිත කැමරා දර්ශනවලට අනුව, තැඹිලි පැහැති බස් රථය දුම්රිය මාර්ගය හරහා ගමන් කරමින් සිටියදී යම් බාධාවක් හෝ මාර්ග සංඥා හේතුවෙන් පීලි මත සිරවී තිබේ. එම අවස්ථාවේ මධ්යම වේගයකින් පැමිණි භාණ්ඩ ප්රවාහන දුම්රියට නියමිත වේලාවට තිරිංග යෙදීමට නොහැකිව බස් රථයේ සෘජුවම ගැටී ඇති බව වාර්තා වෙයි.
තවද, දුම්රිය හරස් මාර්ගයේ ආරක්ෂිත ගේට්ටු නිසි ලෙස ක්රියාත්මක නොවීම හෝ ඒවා නියමිත වේලාවට පහත් කිරීමට නොහැකි වීමද මෙම අනතුරට හේතුවක් විය හැකි බවට සැක පළ කරයි. ගැටීමෙන් පසු විශාල ගින්නක් හටගන්නා අයුරු දැක්වෙන වීඩියෝ දර්ශන සමාජ මාධ්ය සහ ප්රවෘත්ති නාලිකා ඔස්සේ මේ වන විටත් වේගයෙන් සංසරණය වෙමින් පවතී.
බැංකොක් පොලිස් ප්රධානී උරුම්පෝන් කුන්ඩෙජ්සුම්රිට්, තායිලන්ත රාජ්ය දුම්රිය සේවයේ වැඩබලන ආණ්ඩුකාර ආනන් ෆොනිම්ඩේන්ග් සහ නියෝජ්ය ප්රවාහන අමාත්යවරයා ඇතුළු නිලධාරීන් මෙම සිද්ධිය පිළිබඳව අදහස් පළ කර ඇති අතර, පුළුල් පරීක්ෂණයක් මේ වන විට ආරම්භ කර ඇත. විශේෂයෙන් දුම්රිය හරස් මාර්ගයේ සංඥා පද්ධතියේ සහ ආරක්ෂිත ගේට්ටුවල දෝෂ මෙන්ම රියදුරන්ගේ අවධානය සම්බන්ධ කරුණු පිළිබඳවද විමර්ශනය කෙරෙමින් පවතී.
තායිලන්තයේ නිරන්තරයෙන් මාර්ග අනතුරු වාර්තා වන අතර, පසුගිය මාස හය තුළ සිදුවූ දෙවන විශාලතම දුම්රිය අනතුර ලෙස මෙම සිදුවීම සැලකේ. ඒ හරහා එරට පොදු ප්රවාහන සේවාවල සහ දුම්රිය හරස් මාර්ග ආරක්ෂාවේ පවතින ගැටලු පිළිබඳව යළිත් අවධානය යොමුවී තිබේ.
