ශ්රී ලංකාවට ආසන්නම ඉන්දීය ප්රාන්තය වන තමිල්නාඩුවේ දේශපාලනය අද පෙරළිකාර වෙනසකට ලක්විය. තමිල් වෙට්රි කලහම් (TVK) පක්ෂයේ නිර්මාතෘ සහ ජනප්රිය සිනමා නළු සී. ජෝසප් විජෙයි හෙවත් “තලපති” විජෙයි, 2026 මැයි 10 දින චෙන්නායි නේරු ගෘහස්ථ ක්රීඩාංගණයේදී තමිල්නාඩුවේ නව මහඇමති ලෙස දිවුරුම් දුන්නේය.
දශක ගණනාවක් තිස්සේ තමිල්නාඩුව පාලනය කළ DMK සහ AIADMK පක්ෂවල බලය අවසන් කරමින් විජෙයිගේ ජයග්රහණය ඉන්දීය දේශපාලනයේ සුවිශේෂී සන්ධිස්ථානයක් ලෙස සැලකේ. 1967 න් පසු බිහි වූ පළමු ද්රවිඩ නොවන නායකත්වයද මෙය වේ. එමෙන්ම MGRට පසු තමිල්නාඩු මහඇමති ධූරයට පත් වූ ප්රථම ප්රකට සිනමා නළුවාද විජෙයිය.
2024දී ආරම්භ කළ TVK පක්ෂය 2026 ප්රාන්ත මැතිවරණයේදී ආසන 108ක් දිනාගෙන විශාලතම පක්ෂය බවට පත්විය. පසුව කොංග්රසය, වාමාංශික පක්ෂ සහ අනෙකුත් සහායක පක්ෂ සමඟ එක්ව නව ආණ්ඩුව පිහිටුවීමට ඔහු සමත් විය.
1974දී චෙන්නායිහි උපත ලැබූ විජෙයි, දමිළ සිනමාවේ දැවැන්තම තරුවක් ලෙස ගිල්ලි, තුප්පාකි, මර්සල්, බිගිල් සහ මාස්ටර් වැනි ජනප්රිය චිත්රපට රැසකින් ප්රේක්ෂක ආදරය දිනා ගත්තේය. සමාජ සහ දේශපාලන පණිවිඩ රැගත් ඔහුගේ චිත්රපට, ඔහුගේ දේශපාලන ගමනටද පදනමක් විය.
දූෂණයෙන් තොර පාලනයක්, රැකියා, අධ්යාපනය සහ දෙමළ අභිමානය ආරක්ෂා කිරීම යන පොරොන්දු මත බලයට පැමිණි විජෙයිගේ නව රජය ඉදිරියේ ජනතා අපේක්ෂාවන් ඉටු කිරීම සහ සන්ධාන ආණ්ඩුවක් පවත්වාගෙන යාම ප්රධාන අභියෝග ලෙස සැලකේ.
